Չախալյանը եւ կարճատեւ քաղաքական նպատակները

Նախագահ Միխեիլ Սահակաշվիլիի եւ ներքին գործերի նախկին նախարար Վանո Մերաբիշվիլիի` Վահագն Չախալյանի ազատ արձակման վերաբերյալ արած հայտարարությունները վկայում են, որ այն ժամանակ, երբ իշխանության գլուխ կանգնած էր «Միացյալ ազգային շարժում» կուսակցությունը, արդարադատություն իրականում չկար: Հայ առաքելական եկեղեցու Վիրահայոց թեմը նման կերպ է արձագանքել Չախալյանի դեմ հնչեցված մեղադրանքներին:

«Եթե Չախալյանը անջատողական  էր և  գործակալ, ապա ինչու չի դատվել Քրեական օրենսդրության համապատասխան  հոդվածներով: Այդ պարադոքսի բացատրությունը  մեկն է.  նախկին իշխանությունն առանձնահատուկ կերպով  օգտագործում էր  արդարադատության  համակարգը  իր  քաղաքական  ընդդիմադիրների  դեմ»,- նշվում է տարածված հայտարարության մեջ:

Վիրահայոց թեմն անդրադարձել է նաեւ Վրաստանում համաներում շնորհված մեկ այլ քաղբանտարկյալի՝ Արմեն Գևորգյանին, ում  նախագահը  նույնպես  մեղադրել է  լրտեսության մեջ: Թեմի տվյալներով` Գևորգյանի  ազատման համար միջնորդել է Վրաստանի կաթողիկոս-պատրիարք  Իլյա Երկրորդը:

Վիրահայոց  թեմը  կոչ է արել առանձին քաղաքական  գործիչների՝ կարճատև քաղաքական նպատակների համար  չօգտագործել այնպիսի  հարցեր, որոնք անմիջականորեն  վերաբերում են երկրի խաղաղությանը և  անդորրին, ինչպես նաեւ հայերի և վրացիների  միջև հարաբերություններին: