Արամ Մանուկյանը հաստատեց խոստովանությունը

Արտահերթ նախագահական ընտրությունների եւ Սերժ Սարգսյանի հրաժարականի պահանջների միջեւ լուրջ տարբերություն կա. լրագրողների հետ հանդիպման ժամանակ պատասխանելով yerkir.am-ի` ՀԱԿ-ի պահանջի փոփոխության վերաբերյալ հարցին` վստահեցրեց ՀՀՇ վարչության նախագահ Արամ Մանուկյանը:

Նա նշեց, որ արտահերթ ընտրությունների պահանջը պարունակում էր բանակցություններ, քննարկումներ, երկկողմանի գործընթաց էր, իսկ անհապաղ հրաժարականը երկխոսություն, քննարկում չի ենթադրում: Արտահերթ խորհրդարանական ընտրությունների պահանջից էլ հրաժարվեցին, «քանի որ չէին ուզում բանակցել այն իշխանության հետ, որը պատերազմ է հայտարարել ժողովրդին»:

Արամ Մանուկյանը հաստատեց նաեւ օրեր առաջ yerkir.am-ի հետ զրույցում արված այն խոստովանությունը, թե երկխոսության արդյունքում համախոհների զանգված են կորցրել եւ, պահանջելով Սերժ Սարգսյանի հրաժարականն այժմ կոշտացնում են դիրքորոշումը, որ իշխանությունն էլ այլեւս չմտածի, թե ՀԱԿ-ին «մատի վրա ֆռռացնում է»: