7 երկրաշարժ՝ Արցախի տարածքում

ԼՂՀ ազգային ժողովի այսօրվա նիստում «Սեյսմիկ պաշտպանության Արեւելյան ծառայություն» ՊՈԱԿ-ի տնօրեն Բորիս Պետրոսյանը ներկայացրել է ԼՂՀ տարածքում սեյսմիկ ռիսկի նվազեցման կարճաժամկետ ծրագրով նախատեսված 2010 թ. աշխատանքների կատարման վերաբերյալ հաղորդագրությունը։

Նրա խոսքերով` անցյալ տարվա ընթացքում ծառայության տարածաշրջանային կայանների կողմից գրանցվել եւ մշակվել է 130 երկրաշարժ։ Գրանցված սեյսմիկ իրադարձություններից 35-ը տեղական են, 7-ը` ԼՂՀ տարածքում, որոնց մագնիտուդը տատանվել է M-1.05-ից մինչեւ M-2.20։

Անցյալ տարի որոշակի ակտիվություն է նկատվել Իրանի հյուսիսարեւմտյան եւ Ադրբեջանի արեւմտյան ու հարավարեւելյան շրջաններում։ Իրանի տարածքում գրանցվել է 26, իսկ Ադրբեջանում` 64 երկրաշարժ։

Հանրապետության առանձին խիտ բնակեցված շրջանների եւ կարեւոր ու վթարավտանգ օբյեկտների սեյսմիկ ռիսկի գնահատման նպատակով կատարվել են համապատասխան աշխատանքներ։ Բորիս Պետրոսյանի հավաստմամբ՝ հնարավորինս վերահսկվում է հանրապետության տարածքում սեյսմակայուն շինարարության գործընթացը։