ԱՄՆ-ը լվանում է ձեռքերը

Նիդերլանդների ռազմաօդային ուժերի ստորաբաժանումները եւ ռազմանավերը մասնակցելու են Լիբիայի դեմ գործողություններին: Այդպիսով` այդ երկրի օդային տարածքը վերահսկող եւ զենքի ներմուծման էմբարգոն ապահովող պետությունների թիվը դարձավ 15:

Մինչդեռ Պենտագոնը հայտարարել է, որի ԱՄՆ-ը չի կարող իրեն երկարատեւ գործողություն թույլ տալ Լիբիայում եւ սահմանափակում է իր զինված ուժերի դերը ֆինանսական պատճառներով:

Երկրի պաշտպանության նախարար Ռոբերտ Գեյթսը հաստատել է, որ ԱՄՆ-ը չի պատրաստվում ցամաքային գործողություն սկսել Քադաֆիի ուժերի դեմ, բացի այդ` մտադիր է ապրիլի 2-ից իր ռազմաօդային ուժերը դուրս բերել կոալիցիոն գործողություններից` հուսալով, որ մյուս երկրները հաջողությամբ կիրականացնեն այդ առաքելությունը. տեղեկացնում է Associated Press-ը:

Այդ հայտարարությունը միանշանակ արձագանք չի գտել Կոնգրեսում. Գեյթսի հայտարարություններին տրվել են «տարօրինակ», «տագնապալի» եւ «նյարդայնացնող» որակումները: