ՀԱՅԿԱԿԱՆ ԺԱՄԱՆԱԿ. Դեսպանը սրում է

Մեր տեղեկություններով` ՀՀ իշխանական լրատվամիջոցներին հրահանգվել է Հայաստանում ԱՄՆ դեսպան Մարի Յովանովիչի դեմ հակաքարոզչություն սկսել` փորձելով դեսպանին մեղադրել Հայաստանի ներքին կյանքին միջամտելու մեջ:

Պատճառը փետրվարի 28-ին Մարի Յովանովիչի` ԵՊՀ-ում ունեցած հայտնի ելույթն է Հայաստանում քաղաքացիական հասարակության ձեւավորման անհրաժեշտության վերաբերյալ: Յովանովիչի պատասխանը չուշացավ:

Երեկ նա հարցազրույց է տվել «Ազատություն» ռադիոկայանին` ասելով. «Քաղաքացիական իրավունքները Հայաստանի ժողովրդին տրված են Հայաստանի Սահմանադրությամբ: Այն շատ հստակորեն սահմանում է ե՛ւ հավաքների ազատությունը, ե՛ւ մամուլի ազատությունը, ե՛ւ օրենքի իշխանությունը: Դրանք Հայաստանի ժողովրդի իրավունքներն են, ինչը գրված է Սահմանադրության մեջ, եւ ես կարծում եմ, որ դրանք կարեւոր արժեքներ են»:

Իսկ նրա դիտարկումը, թե «կառավարությունն է ժողովրդի համար, այլ ոչ թե հակառակը», մեկնաբանության կարիք, թերեւս, չունի: