Ադրբեջանը չի վերահսկում սեփական զինված ուժերը, կամ ինքն է կազմակերպում սադրանքները

ԼՂՀ պաշտպանական բանակի տարածած հաղորդագրության համաձայն հունվարի 20-ին ղարաբաղա-ադրբեջանական շփման գծում հակառակորդը սանձազերծել է ինտենսիվ հրաձգություն, ինչին հայկական զինված ուժերը արժանի հակահարված են տվել: Փոխհրաձգության հետեւանքով հայկական կողմից զոհվել է զինծառայող Հովիկ Մկրտիչի Սուքիասյանը, իսկ ադրբեջանական կողմի զոհերի թիվը եւ անունները հայտնի չեն:

«Այս միջադեպը եւս մեկ անգամ փաստում է, որ Ադրբեջանի իշխանությունները կամ չեն վերահսկում սեփական զինված ուժերի վարքագիծը առաջնային գծում, կամ իրենք են կազմակերպում նման սադրանքները: Երկու դեպքում էլ պատասխանատվությունը Ադրբեջանի ղեկավարության վրա է»,- մեկնաբանելով կատարվածը ասել է ՀՀ պաշտպանության նախարարի մամուլի քարտուղար Դավիթ Կարապետյանը:
ՀՀ Պաշտպանության նախարարությունը խորապես ցավակցում է միջադեպի հետեւանքով զոհված Հովիկ Սուքիասյանի հարազատներին: