Իրանի գերագույն առաջնորդը հաստատել է իր կնոջ, քրոջ և նրա մանկահասակ երեխայի մահը

Իրանի գերագույն առաջնորդ Մոջթաբա Խամենեին հրապարակել է իր առաջին հայտարարությունը, որով հաստատել է իր ընտանիքի մի քանի անդամների մահը վերջերս տեղի ունեցած հարվածի ժամանակ: Հայտարարությունը տարածել են մի քանի իրանական լրատվամիջոցներ:

Հայտարարության մեջ Խամենեին նշել է, որ զոհվածների թվում են իր մերձավոր ազգականները՝ կինը, քույրը և ընտանիքի այլ անդամներ:

Նա նշել է, որ տեղի ունեցածն իր համար ծանր անձնական կորուստ է, սակայն ընդգծել է, որ նման կորուստները չեն փոխի երկրի ընթացքը:

«Հորիցս բացի, որի կորուստը ազգային վիշտ էր, ես նահատակների քարավան եմ ուղեկցել նաև իմ սիրելի և հավատարիմ կնոջը, իմ անձնուրաց քրոջը, նրա մանկահասակ երեխային և իմ մյուս քրոջ ամուսնուն»,- ասվում է հայտարարության մեջ:

Նույն ուղերձում Խամենեին վստահություն է հայտնել, որ Իրանը կշարունակի հետևել իր ընտրած ուղուն՝ չնայած ճնշումներին և կորուստներին, և որ ըզոհվածների հիշատակը կդառնա դիմադրողականության և միասնության աղբյուր երկրի համար: