Իսրայելի նախագահը հայտարարել է, որ անհամբեր սպասում է Իսրայելում Ադրբեջանի դեսպանության բացմանը

Իսրայելը կողմ է Ադրբեջանի հետ տնտեսական հարաբերությունների զարգացմանը և անհամբեր սպասում է Ադրբեջանի դեսպանատան բացմանը. հայտարարել է Իսրայելի նախագահ Ռեուվեն Ռիվլինը: Այս մասին ասվում է նրա՝  Ադրբեջանի «Հանրապետության օրվա» առթիվ Իլհամ Ալիևին հղված շնորհավորական նամակում:

«Ադրբեջանը, լինելով Իսրայելի կարևոր և սերտ գործընկերը, բարեկամ և դաշնակից է: Ես շնորհավորում եմ ձեզ և ձեր երկրին Իսրայելում Ադրբեջանի առևտրի և զբոսաշրջության գրասենյակների բացման կապակցությամբ, ինչը կնպաստի մեր տնտեսական կապերի զարգացմանը և ժողովուրդների մերձեցմանը: Առաջիկայում անհամբեր սպասում եմ Իսրայելում Ադրբեջանի դեսպանության բացմանը», - ասվում է Իսրայելի նախագահի կայքում հրապարակված շնորհավորանքի տեքստում: