Լեհաստանի նախագահը Ռուսաստանին անվանել է «ազատության թշնամի»

Լեհաստանի նախագահ Անջեյ Դուդան չի կարողացել դիմակայել հակառուսական հռետորաբանությանը երկրի Սահմանադրության օրվա կապակցությամբ ելույթում՝ հիշեցնելով 1792 թվականի իրադարձությունները. հայտնում է ՏԱՍՍ-ը։

Երկուշաբթի Լեհաստանը նշում է առաջին սահմանադրության 230-ամյակը: Տոնակատարությանը Վարշավա են ժամանել Ուկրաինայի, Լիտվայի, Լատվիայի և Էստոնիայի նախագահները:

«Մայիսի Սահմանադրությունը արձանագրել է կարգախոսը՝ «Մարդկային հասարակության ցանկացած իշխանություն բխում է ժողովրդի կամքից»: Այս հիանալի ուղերձը սերունդներով փոխանցվել է և դարձել մեր պատմական ժառանգության հսկայական գանձը, մեր ժողովրդավարության հիմքը։ Իրականում, հենց դա է պատճառը, որ ազատության թշնամիները չկարողացան դիմանալ մայիսի 3-ի սահմանադրությանը: Այդ պատճառով իմպերիալիստական Ռուսաստանը պատերազմ հայտարարեց»,- ասել է Լեհաստանի նախագահը՝ նկատի ունենալով 1792-ի ռուս-լեհական պատերազմը:

Դրանից հետո տեղի ունեցած դեբատների ժամանակ, դիմելով Ուկրաինայի նախագահ Վլադիմիր Զելենսկիին, Դուդան շեշտել է, որ Լեհաստանը Ղրիմը և Դոնբասը համարում է «Ռուսաստանի կողմից օկուպացված»: