Հայերը SpaceX-ի կենտրոնակայանի առջև ցույցով պահանջել են չեղարկել Թուրքիայի հետ գործարքը

Էլեկտրոնային հաղորդագրությունների արշավից հետո այս անգամ հարյուրավոր հայեր ցույց են արել Կալիֆոռնիայի Հոթորն քաղաքում՝ SpaceX-ի կենտրոնակայանի առջև՝ ընդդեմ Թուրքիայի կառավարության հետ ընկերության արբանյակային գործարքի: Բողոքի ակցիայի մասին հայտնում է ABC7-ը:

SpaceX-ը նախատեսում է նոյեմբերի 30-ին Ֆլորիդա նահանգից գործարկել Turksat-5A արբանյակը: Նշվում է, որ արբանյակը կառուցվել է «Airbus Defence»-ի և «Space»-ի կողմից, և ներկայացվել է, թե նախատեսված է «Թուրքսաթ» պետական ընկերության հեռուստատեսային հեռարձակման ու հարակից հաղորդակցությունների մեջ օգտագործելու համար: Բողոքի ակցիա իրականացնողները հավատացած են, որ արբանյակը Թուրքիայի կառավարության կողմից կարող է օգտագործվել ռազմական նպատակներով: Հոդվածում հիշեցվում է, որ Թուրքիան ներկայումս օգնում է Ադրբեջանին Լեռնային Ղարաբաղի դեմ պատերազմում:

Ավելի վաղ աշխարհի տարբեր ծայրերից հայերը SpaceX-ին ուղղված էլեկտրոնային նամակների արշավ էին սկսել: SpaceX-ի աշխատակիցների էլեկտրոնային փոստերը հեղեղվել են նամակներով, որոնցում կոչ է արվում ընկերությանը՝ չեղյալ հայտարարել Թուրքիայի կառավարության հետ կնքված գործարքը և չօգնել Էրդողանի ռեժիմին: