Կարմիր խաչի միջազգային կոմիտեն դատապարտել է բնակելի տարածքներում պայթուցիկ ծանր զենքերի կիրառումը

Կարմիր խաչի միջազգային կոմիտեն հայտարարություն է տարածել, որում դատապարտել է Լեռնային Ղարաբաղի շուրջ զինված հակամարտության ընթացքում պայթուցիկ ծանր զինատեսակների կիրառումը բնակեցված տարածքներում։

Ժնևում ԿԽՄԿ Եվրասիայի տարածաշրջանային ղեկավար Մարտին Շյուպը, մասնավորապես, հայտարարել է.

«Կարմիր Խաչի միջազգային կոմիտեն խստորեն դատապարտում է չտարբերակված գնդակոծությունների և պայթուցիկ զենքերի կիրառմամբ իրականացված այլ անօրինական հարձակումների հաղորդված դեպքերը քաղաքներում, գյուղերում և բնակեցված այլ տարածքներում, որոնց հետևանքով զոհվում կամ ծանր, այդ թվում՝ կյանքը խեղող վիրավորումներ են ստանում քաղաքացիական անձինք», ու հավելել.  «Հարկավոր է ձեռնարկել բոլոր հնարավոր միջոցները՝ պաշտպանելու և խնայելու քաղաքացիական անձանց և ենթակառուցվածքները, ինչպիսիք են հիվանդանոցները, դպրոցները և շուկաները։ Քաղաքացիական անձանց ջրամատակարարումը ևս պետք է պաշտպանվի։ Սրանք միջազգային մարդասիրական իրավունքի ներքո ստանձնված պարտավորություններ են»։

Պաշտոնյայի խոսքով՝ բնակելի տարածքներում զինվորական թիրախների դեմ գործածվող պայթուցիկ զենքերի կիրառումը կարող է խախտել հումանիտար իրավունքը, որով արգելվում են չտաբերակված և անհամաչափ հարձակումները: