Ճապոնիայի կառավարությունը հրաժարական է տվել

Ճապոնիայի վարչապետ Սինձո Աբեի կառավարությունն ամբողջ կազմով հրաժարական է տվել. հայտնում է Kyodo գործակալությունը։

Նշվում է՝ այսօր երկրի խորհրդարանը քվեարկության կդնի նոր վարչապետի թեկնածությունը. նոր վարչապետ կդառնա իշխող Լիբերալ-դեմոկրատական կուսակցության՝ ավելի վաղ ընտրված ղեկավար Յոսիհիդե Սուգան։

Քվեարկությունից հետո Սուգան նոր կառավարություն կձևավորի։ Նախարարների մեծ մասն, ամենայն հավանականությամբ, կպահպանեն իրենց տեղերը։

Հիշեցնենք՝ Սինձո Աբեն 7 տարի և 8 ամիս կառավարումից հետո օգոստոսի 28-ին հայտարարել էր վարչապետի պաշտոնը լքելու մտադրության մասին: Պատճառը քրոնիկական հիվանդության վատթարացումն է։