Լևոն արքեպիսկոպոս Զեքիյանը հյուրընկալել է Մխիթար Հայրապետյանին

Վենետիկի Մխիթարյան միաբանության քահանայապետական պատվիրակ, Գերապայծառ տեր Լևոն արքեպիսկոպոս Զեքիյանը երեկ Վենետիկի Սուրբ Ղազար կղզում հյուրընկալել է ՀՀ Ազգային ժողովի պատգամավոր Մխիթար Հայրապետյանին: Այս մասին տեղեկացնում է պատգամավորի օգնական Մարի Մանուկյանը: 

Նա նախ մասնակցել է դեռևս 1717 թ. Մխիթար Սեբաստացու կողմից հիմնված եկեղեցում մատուցվող սուրբ պատարագին, ապա շրջայց կատարել կղզում` ծանոթանալով Մխիթարյանների կողմից սերունդներին փոխանցված անօրինակ ժառանգությանը: Հանդիպման ընթացքում Հայրապետյանը Սրբազանի հետ քննարկել է Մխիթարյան միաբանության առջև ծառացած մարտահրավերները և, մասնավորապես, վերջին օրերին մեծ հնչեղություն ստացած Սևրի Սամուել Մուրադյան վարժարանի (Ֆրանսիա) խնդիրը: Հայրապետյանը վերահաստատել է պետության դիրքորոշումը, այն է` Սփյուռքի ազգային հարստությունները ենթակա չեն վաճառքի ու պիտի ելքեր փնտրել` դրանք հզորազնելու, ինքնաբավ դարձնելու ուղղությամբ: Նա նաև պետության անունից պատրաստակամություն է հայտնել աջակցել համատեղ ելքեր փնտրելու գործընթացին, որը դրական արձագանք է ստացել Լևոն արքեպիսկոպոս Զեքիյանի կողմից:

Կողմերը պայմանավորվածություն են ձեռք բերել շարունակել քննարկումներն այս ուղղությամբ արդեն Երևանում` առաջիկա սեպտեմբերին:

Հավելենք, որ Մխիթար Հայրապետյանի հետ հանդիպմանը մասնակցել են նաև պատգամավորներ Հովհաննես Հովհաննիսյանը և Վաղարշակ Հակոբյանը: