Վրաստանում դեռահասի մահվան գործով նոր հետաքննություն կսկսվի

Վրաստանի վարչապետ Գեորգի Կվիրիկաշվիլին հայտարարել է, որ Թբիլիսիում բողոքի ցույցերի պատճառ դարձած` դեռահասի սպանության գործով նոր, թափանցիկ հետաքննություն է սկսվելու. հայտնում է РИА Новости-ն:

Հիշեցնենք, որ ցույցերը հանգեցրել են երկրի գլխավոր դատախազի հրաժարականին:

 «Վաղվանից ՆԳՆ կվերադարձվի գործի քննությունը, և փոխվարչապետը (ՆԳՆ ղեկավարը) կղեկավարի հետաքննության ընթացքը: Ես, իհարկե, կմիանամ և կվերահսկեմ այդ գործընթացը»,- ասել է վարչապետը հատուկ ճեպազրույցի ժամանակ:

Թբիլիսիի քաղաքային դատարանը 2017 թվականի դեկտեմբերի 1-ին մայրաքաղաքի դպրոցներից մեկում տեղի ունեցած զանգվածային ծեծկռտուքի հետևանքով մահացած երկու անչափահասների գործով որոշումն էր հրապարակել։ Ըստ որոշման՝ անչափահասներից միայն մեկի սպանության մեջ կասկածվողին է դատարանը մեղավոր ճանաչել։ Դատարանի որոշումը բողոք էր առաջացրել: Ակցիայի մասնակիցների կարծիքով` հետաքննությունն արդար չի եղել, և փորձ է արվում պատժից ազատել միջադեպի մասնակիցներից մեկին` դատախազության նախկին աշխատակցի որդուն: