Կահիրեի հրապարակում Էրդողանին ծաղրող պաստառներ են տեղադրվել

Կահիրեի Թահրիր հրապարակում «Nineva el-Gad» հեռուստաընկերությունը Թուրքիայի նախագահ Ռեջեփ Թայիփ Էրդողանին հասցեին վիրավորանքներ պարունակող պաստառներ է տեղադրել. տեղեկացնում է Ermenihaber-ը:

Հեռուստաընկերության ներկայացուցիչներից մեկը թուրքական «Անադոլու» լրատվական գործակալության հետ զրույցում նշել է, որ գովազդային վահանակների վրա փակցված պաստառներին պատկերված է եղել Էրդողանը՝ նստած խալիֆայական գահին: Այս կերպ եգիպտական հեռուստաընկերությունը  ծաղրել է Թուրքիայի նախագահի՝ Օսմանյան խալիֆայության վերականգնման մասին երազանքները:

Թուրքական լրատվամիջոցների տեղեկացմամբ՝ Եգիպտոսի ոստիկանությունն արագ հեռացրել է պաստառները:

Նշվում է, որ նույն El- Gad հեռուստաընկերությունը Թուրքիայում տեղի ունեցած ռազմական հեղաշրջման փորձից հետո իսլամի քարոզիչ, ամերիկաբնակ միլիարդատեր Ֆեթթուլահ Գյուլենի հետ հարցազրույց է անցկացրել: Վերջինիս թուրքական իշխանությունները մեղադրում են հեղաշրջման փորձի կազմակերպման մեջ: