Հովհաննես Եսայանի հետ եւս երեք ուսանող է հեռացվել ԵՊՀ-ից. նախարար

Այսօր` կառավարության նիստից հետո, լրագրողները ԿԳ նախարար Լևոն Մկրտչյանից հետաքրքրվեցին՝ ինչ փուլում է ԵՊՀ բանասիրության ֆակուլտետից դուրս մնացած ուսանողի գործը: Հիշեցնենք, որ ԵՊՀ բանասիրության ֆակուլտետից հեռացվել է Հովհաննես Եսայանը՝ ֆիզկուլտուրայից ունեցած լուծարքի պատճառով:

Լևոն Մկրտչյանը նշեց, որ ինքը ճշտել է այդ պատմությունը, ԵՊՀ-ից ստացել են տեղեկանք` ոչ միայն Հովհաննես Եսայանն է հեռացվել, այլև 3 ուսանող՝ ֆիզկուլտուրայի դասերին երկու տարի շարունակ չմասնակցելու պատճառով, և երկու տարվա ընթացքում այդ ուսանողներին հնարավորություն է տրվել վերականգնվելու:

«Եվ երկու տարվա չվերականգնվելու պատճառով չորս ուսանող հեռացվել է բուհից: Մամուլում հրապարակումներ եղան: Կփորձեմ ԵՊՀ ռեկտորի հետ մեկ անգամ ևս խոսել»,- ասաց նախարարը:

Հարցին, թե արդյո՞ք ուսանողները հեռացվել են քաղաքական հայացքների համար, Մկրտչյանը պատասխանեց, որ պետք է որոշակի ապացույցներ լինեն` նման բան պնդելու համար, որովհետև, ռեկտորի խոսքով, ևս 3 հոգի հեռացվել է ֆիզկուլտուրայի դասերին չմասնակցելու և վերականգնվելու հնարավորությունը չկիրառելու համար: