Նախագահի ելույթին հետեւելու է ՀՅԴ-ի հետ համագործակցությունը. ՀՀԿ-ական

ՀՀԿ-ՀՅԴ համագործակցության վերաբերյալ հստակություն կլինի առաջիկայում.  լրագրողներին ասաց ՀՀԿ խմբակցության քարտուղար Գագիկ Մելիքյանը:

Ըստ նրա`արդեն իսկ պաշտոնապես հայտարարվել է, որ համագործակցության համար նախնական պայմանավորվածություններ կան, բանակցությունները շարունակվում են:

«Այս առումով` շատ եմ կարևորում նախագահի ծրագրային ելույթը ապագայի տեսլականի վերաբերյալ: Նրա կարծիքին, որ ելույթում հնչեցվեց, պետք է հետևի նաև ՀՅԴ-ի հետ համագործակցության առումով արագ գործընթացը: Դաշնակցությունն իր համար նպատակ էր հետապնդել նաև սահմանադրական բարեփոխումներին օժանդակելը. ՀՅԴ-ի` Սահմանադրության վերաբերյալ բավական լուրջ առաջարկներ ընդունված են, և ՀՅԴ-ն պատասխանատու է նաև Սահմանադրության իրականացման համար»,- ասաց Մելիքյանը` հավելելով`համագործակցությունն իրականացվում է քաղաքական կայունություն ապահովելու նպատակով:

«Պետք է այս դրույթից ելնի համագործակցությունը Դաշնակցության հետ: Առաջիկայում Դաշնակցության հետ համագործակցության ձևաչափի մասին կոնկրետ հայտարարություններ կլինեն, սակայն դրանք կլինեն իրենց ժամանակին»,- նշեց ՀՀԿ-ականը: