Ըստ Վահե Հակոբյանի` Սուրիկ Խաչատրյանը «չի վերարտադրվի»

ՀՀԿ համագումարից առաջ Գորիսի քաղաքապետի առաջիկա ընտրությունների մասին լրագրողների հետ զրուցեց Սյունիքի մարզպետ  Վահե Հակոբյանը:

Լրագրողների դիտարկմանը, թե Սյունիքում, ըստ էության, ճնշումներ են եղել ինքնաբացարկ հայտնած  թեկնածուների վրա, մարզպետը պատասխանեց, որ, իր ունեցած տվյալներով, ճնշումներ չեն եղել:

Yerkir.am-ի հարցին` ինչո՞ւ ինքնաբացարկ հայտնեց իր թեկնածուն (Տիգրան Կարապետյանը), Վահե Հակոբյանը պատասխանեց, որ ինքը թեկնածու չունի, բայց նաեւ հայտնեց. «Նա իմ  ընկերն է: Նա արդեն ասել է, որ ստեղծված իրավիճակում Գորիսի համար ամենաարդյունավետ լուծումն իր ինքնաբացարկն էր»:

Մեր այն դիտարկմանը, թե, փաստորեն, Գորիսի ընտրություններում հաղթում է Սուրիկ Խաչատրյանի հովանավորյալը (Վաչագան Ադունց) մարզպետն արձագանքեց. «ՀՀԿ-ն է առաջադրել թեկնածուին»:

Նա չհամաձայնվեց մեր այն դիտարկման հետ, որ Ադունցի սպասելի  հաղթանակով, փաստորեն, Սուրիկ Խաչատրյանը կլուծի իր վերարտադրության խնդիրը: «Չեմ կարծում»,- ասաց Վահե Հակոբյանը:

Նշենք նաեւ, որ Գորիսի քաղաքապետի մեկ այլ` ինքնաբացարկ հայտնած թեկնածուի' Արա Բուդաղյանի ինքնաբացարկի պատճառներից Վահե Հակոբյանը, ինչպես ինքն ասաց, տեղյակ չէ, չի զրուցել նրա հետ: «Նշանակություն չեմ տալիս: Իր որոշումն է»,- ասաց մարզպետը:

Yerkir.am-ի խնդրանքով անդրադառնալով իր եւ Սուրիկ Խաչատրյանի հարաբերություններին` Վահե Հակոբյանը նշեց, որ շփվում են զուտ կուսակցական ֆորմատի շրջանակներում: