''Դոմոդեդովո''-ի ոստիկանապետը ձերբակալվել է հայերին ծեծելու համար

Հունվարի 21-ին ձերբակալվել է Մոսկվայի «Դոմոդեդովո» օդանավակայանի  ոստիկանապետ Մաքսիմ Տիտովը: Նա  կասկածվում է լիազորությունները չարաշահելու մեջ. հայտնում է Известия-ն:  Դեպքը տեղի էր ունեցել այն ժամանակ, երբ ոստիկանը զբաղեցնում էր Մոսկվայի ոստիկանության «Կոմունարսկի» բաժնի պետի տեղակալի պաշտոնը: 

«2012-ին  ոստիկանության հերթապահ մասը հաղորդագրություն էր ստացել  կասկածելի անձանց հավաքի մասին: Դեպքի վայր ժամանած ոստիկանները հավաքվածներից պահանջել էին փաստաթղթեր ներկայացնել, սակայն նրանք հրաժարվել էին: Տիտովը մի քանի անգամ հարվածել էր նրանցից մեկին»,- գրում է  թերթը:

Սակայն ծեծի ենթարկված անձինք պատմությունն այլ կերպ են ներկայացրել: Նրանցից մեկը՝ Արսեն Գասպարյանը, պատմել է, որ ոստիկանները հարբած են եղել, քանի որ նշել են նույն Տիտովի պաշտոնի բարձրացումը: