Այս անգամ էլ բյուջեն վարչապետը չներկայացրեց

Այսօր ԱԺ-ում ներկայացվեց «2014թ. բյուջեի մասին» օրենքի նախագիծը, որն այս անգամ ներկայացնում էր ՀՀ ֆինանսների նախարար Դավիթ Սարգսյանը:

Նախարարը հայտարարեց, որ բյուջեի սոցիալական քաղաքականությունը միտված է լինելու մակրոտնտեսական ցուցանիշների կայունությանն ու տնտեսական աճին: Հարկային վարչարարության բեռի ավելացում չի նախատեսվում: Նախարարը նշեց, որ պետական բյուջեի ծախսերն ունեն գերակայություններ, դրանք են` սոցիալական ոլորտի առանձին ճյուղերում պետական մարմինների գործունեության արդյունավետության բարձրացում, պաշտպանության ոլորտին անհրաժեշտ ֆինանսական միջոցների տրամադրում, գյուղատնտեսության, էներգետիկայի ոլորտներում ենթակառուցվածքների զարգացում:

Հաջորդ կարևոր սկզբունքը, նախարարի խոսքով, աշխատավարձերի համադրումն է ու միասնական սանդղակի ձևավորումը: Նախարարը նշեց, որ նախատեսվում են մոտ 270 միլիարդ դրամի չափով պետական գնումներ, իսկ միջազգային վարկային ծրագրերի հետ մեկտեղ` 400 միլիարդ դրամի չափով:

Հիշեցնենք, որ անցած անգամ էլ բյուջեն չէր ներկայացնում վարչապետ Տիգրան Սարգսյանը: Այդ ծանր գործն իր ուսերին էր վերցրել այն ժամանակվա ֆինանսների նախարար, ներկայումս կառավարության աշխատակազմի ղեկավար-նախարար Վաչե Գաբրիելյանը: