Քրդական հարցում Անկարան հետդարձի տեղ չունի

Անկարան քրդական հարցում հետդարձի ճանապարհ չունի: «Դա նույնն է, թե վարար գետը լողալով անցնելը»,- հայտարարել է Թուրքիայի արտգործնախարար Ահմեդ Դավութօղլուն. տեղեկացնում է Hurriyet-ը:

Նա նշել է, որ ռիսկի են դիմել ինչպես կառավարությունը, այնպես էլ «կազմակերպությունը»` խուսափելով Քրդական բանվորական կուսակցություն անունից:

Դավութօղլուն նաեւ հավելել է, որ դժվար է դարձյալ զենք վերցնել, երբ հասարակությունը խաղաղության հույս ունի: «Իհարկե, ոչ ոք չի կարող սպասել, որ գործընթացը հարթ կընթանա: Սակայն երբ տեսնում եք դժվարությունները, կարող եք կանխել դրանք: Հոգեբանական շեմը, որն, իմ կարծիքով, դժվարությունների 60 տոկոսն է, հաղթահարված է: Ուժերի դուրսբերումը եւ զենքի հանձնումը փուլեր են` կապված գործընթացի իրականացման հետ: Գործընթացից հրաժարվելը հիմա բարձր գին կունենար բոլորի համար»,- հայտարարել է Թուրքիայի արտգործնախարարը: