Հույները դժգոհում են

Ավելի քան 10 հազար մարդ այսօր հավաքվել է Աթենքի Սինտագմա հրապարակում: Ցուցարարներն իրեն դժգոհությունն են հայտնում խորհրդարանում ավելի խիստ տնտեսման միջոցառումների փաթեթի կայանալիք քվեարկության կապակցությամբ. տեղեկացնում էИТАР-ТАСС-ը:

«Համաբանվորական մարտական ճակատ» արհմիության անդամներն ամեն ինչ անում են պատգամավորների մուտքը խորհրդարանի շենք խոչընդոտելու համար: Սակայն ակցիան ավելի շատ խորհրդանշական է, քան գործնական:

Միաժամանակ, երկրում շարունակվում է երկօրյա գործադուլը: Խախտվել է երկաթուղային եւ ծովային հաղորդակցությունը, չի գործում Աթենքի օդանավակայանը: Գործադուլին մասնակցում են նաեւ պետական հիմնարկների, բանկերի, հարկային եւ մաքսային տեսչությունների աշխատակիցները, բժիշկներ:

Անցյալ չորեքշաբթի ավելի մասշտաբային ցույց էր տեղի ունեցել` ավելի քան 200 հազար մասնակցով, որի ընթացքում տեղի էին ունեցել բախումներ ոստիկանության հետ: Տուժել էր 50 ոստիկան եւ 3 ցուցարար: