Պոլսի հայոց պատրիարքության շքանշանը` թուրք քաղաքապետին

Կոստանդնուպոլսի հայոց պատրիարքությունը առաջին անգամ իր բարձրագույն` Հովհաննես Կոլոտ պատրիարքի շքանշանը շնորհել է մահմեդականի: Պատրիարքության 550-ամյակի նախաշեմին ոսկե շքանշանը հանձնվել է Ստամբուլի Շիշլիի շրջանի քաղաքապետ Մուստաֆա Սարըգյուլին. տեղեկացնում է թուրքական «Հուրիեթը»:

Նման բարձր պարգեւի է արժանացել նաեւ «Գալուստ Գյուլբենկյան» հիմնադրամի տնօրեն Զավեն Էվակյանը:

Պարգեւները հանձնվել են մայիսի 29-ին Ստամբուլի Սբ Աստվածածին եկեղեցում կատարված պատարագից հետո: Շիշլիի քաղաքապետին շքանշանը հանձնելիս պատրիարքական փոխանորդ Արամ արքեպիսկոպոս Աթեշյանն ընդգծել է, որ այն շնորհվում է «Ստամբուլի հայկական համայնքի զարգացման գործում ունեցած զգալի ավանդի, սոցիալական, կրթական նախագծերին, հայկական եկեղեցիների վերականգնմանը աջակցելու համար»:

Ի պատասխան` Սարըգյուլը հայերեն ասել է` «քեզի շատ կսիրեմ», ապա նշել, որ պարգեւը պարտավորեցնում է ավելի շատ ջանք գործադրել ազգային եւ կրոնական փոքրամասնությունների նկատմամբ հանդուրժողականությունը մեծացնելու ուղղությամբ: