Որսագողություն` ԼՂՀ-ում

Ոստիկանության Վայքի բաժնի ծառայողները մարտի 13-ի երեկոյան Երեւան-Մեղրի ճանապարհի 134-րդ կիլոմետրում կանգնեցրել են 39-ամյա Միխայիլ Ն.-ի վարած ՎԱԶ-21011 մակնիշի ավտոմեքենան, որի բեռնախցիկում հայտնաբերվել են 2 մացառախոզի, 5 անտառային թռչնի որսի միս, երկփողանի եւ «Կարաբին» տիպի հրացաններ, տարբեր տրամաչափի փամփուշտներ. տեղեկացնում է ՀՀ ոստիկանության մամուլի ծառայությունը:

Որսագողը խոստովանել է, որ օրինական կերպով իրեն պատկանող հրացաններով ապօրինի որս է կատարել ԼՂՀ Տիգրանավան գյուղին հարող տարածքներում` ընկերոջ` 21-ամյա Արսեն Բ.-ի հետ:

Ոստիկաններն առգրավել են որսագողի հրացանները, փամփուշտները եւ որսը: Դեպքի առթիվ կատարվում է քննություն: