Վալերի Քոչարյանի մասին՝ նոր սերնդին. գործարկվել է եռալեզու կայք

Այսօր առավել քան երբևէ կարևոր է կրթել ու ոգեշնչել նոր սերունդը ազգային հերոսների օրինակով։ Ստեղծվել է նոր կայք, որը եռալեզու ներկայացնում է եզակի մարդու՝ Վալերի Սեդրակի Քոչարյանի կերպարը՝ որպես մեծ գաղափարների, անմնացորդ նվիրումի և հայրենասիրության կենդանի խորհրդանիշ։ Կայքում Վալերի Քոչարյանի կյանքի ուղին է, որը համադրում է զինվորի խիզախությունը, գրողի տեսլականը և գյուտարարի միտքն ու ստեղծագործ ուժը։

Վալերի Քոչարյանը ՀՀ երկրորդ նախագահ Ռոբերտ Քոչարյանի ավագ եղբայրն է։  Ծնվել է 1952 թ․ Ստեփանակերտում։ Կյանքի քառասունվեց տարվա ընթացքում հասցրել է թողնել մի ժառանգություն, որն այսօր շարունակում է ոգեշնչել սերունդներին։

Արցախյան ազատամարտի տարիներին ստեղծել է փոքրիկ լաբորատորիա, որտեղ զենք ու զինամթերք է արտադրել։ Չնայած զենքի փորձարկման ժամանակ ստացած ծանր վիրավորումներին, Վալերի Քոչարյանը չնահանջեց։ Նա հաղթահարեց տասնյակ վիրահատություններ, շարունակեց գրել, գործել, և դարձավ Հայաստանի գրողների միության անդամ։

Վալերի Քոչարյանը՝ որպես ազգային հերոս, նոր սերնդի համար թողնում է ոչ միայն հիշողություն, այլ կենդանի օրինակ՝ ինչպես ապրել հայրենիքի համար։ Նրա հիշատակը ապրում է մեր սրտերում՝ ոգեշնչելով հաղթահարել ամեն փորձություն հանուն ազգային միասնության ու պետականության։

Կայք կարող եք այցելել հետևյալ հղմամբ։