Բագրատ Սրբազանի կալանավորման միջնորդությունը կքննի Մասիս Մելքոնյանը

Բագրատ Սրբազանի կալանավորման միջնորդությունը կքննի Երևանի ընդհանուր իրավասության քրեական դատարանի դատավոր Մասիս Մելքոնյանը։ Տեղեկությունը լրագրողների հետ զրույցում հայտնեց փաստաբան Հովհաննես Խուդոյանը։

Միջնորդության քննությունը նախատեսված է ժամը 22:00-ին։

Հիշեցնենք, որ հունիսի 20-ին, երբ Նիկոլ Փաշինյանը մեկնել էր Էրդողանի հետ հանդիպելու, ոստիկանության ներքին զորքերը գրավել էր մայրաքաղաքը ու մոտ 80 մարդու բերման ենթարկել։ ՔԿ-ն հայտարարեց, որ նշված անձինք չեն ներկայացվել նախաքննական մարմին եւ որ իրենց մոտ որեւէ վարույթ չի քննվում։ Երեկ իշխանամերձ լրատվականով տարածվեց «հեղաշրջան պլանի» մասին ինչ-որ նյութ, որի տիրաժավորմանն անմիջական մասնակցություն ունեցան Նիկոլ Փաշինյանն ու Ալեն Սիմոնյանը, ինչից հետո ՔԿ-ն հայտարարեց այն քննության առարկա դարձնելու մասին, իսկ այսօր արդեն վաղ առավոտից խուզարկություններ են իրականացվել քաղաքական ընդդիմախոսների բնակության վայրերում, ինչին հաջորդել են ընդդիմախոսների ձերբակալությունները։ Այս պահին հայտնի է 14 անձի ձերբակալության մասին, որոնց մեղադրանք է ներկայացվել՝ ահաբեկչության նախապատրաստման և իշխանության յուրացման նախապատրաստման հատկանիշներով, նրանց կալանավորելու միջնորդություն է ներկայացվել դատարան։