Մոլդովան չի անցել ժողովրդավարության թեստը․ Վրաստանի վարչապետ

Վրաստանի վարչապետ Իրակլի Կոբախիձեն կարծում է, որ Մոլդովան չկարողացավ հաղթահարել ժողովրդավարության թեստը նախագահական ընտրությունների և եվրաինտեգրման հանրաքվեի ժամանակ, փոխանցում է РИА Новости-ն։

«Մոլդովան, ի դեմս այս ընտրությունների, ժողովրդավարության ոչ մի թեստ չի անցել. թեկնածուներին հեռացրել են անիմաստ պատրվակներով։ Եվ նման ընտրություններ անցկացրած Մոլդովային մեզնից առաջ են դասում»,- երկուշաբթի լրագրողներին ասել է Վրաստանի վարչապետը։

Կոբախիձեն անարդար է համարում այն պնդումը, որ Մոլդովան արժանի է լինել Եվրամիության անդամ, իսկ Վրաստանը՝ ոչ, հատկապես անցած ընտրությունների և հանրաքվեի ֆոնին։

«Սա ամոթ է, հենց որ Ուկրաինայում պատերազմն ավարտվի և ընտրություններ անցկացվեն, այն ժամանակ արդարությունը կվերականգնվի»,- կարծում է Վրաստանւ վարչապետը։

Հիշեցնենք՝ նախագահական ընտրություններին զուգահեռ հանրապետությունում անցկացվել է եվրաինտեգրման հանրաքվե։ Քվեաթերթիկների 98,38%-ը մշակելուց հետո ԵՄ-ին ինտեգրվելու օգտին քվեարկել է ընտրողների 50,07%-ը, դեմ՝ 49,93%-ը։