Թուրքիան ՆԱՏՕ-ի դաշնակիցներից սպասված աջակցությունը չի ստացել. Էրդողան

Թուրքիան ՆԱՏՕ-ի իր դաշնակիցներից սպասված աջակցությունը չի ստացել ո՛չ պաշտպանության, ո՛չ ահաբեկչության դեմ պայքարում. հայտարարել է Թուրքիայի նախագահ Ռեջեփ Թայիփ Էրդողանը՝ ելույթ ունենալով «Հըզըրռեիս» սուզանավը քարշակելու և «Սելմանռեյս» սուզանավի առաջին եռակցման արարողության ժամանակ Գյոլջյուք նավաշինարանում։

«Թուրքիան չի ստացել այն աջակցությունը, որն ակնկալում էր իր դաշնակիցներից՝ ո՛չ իր պաշտպանական կարիքները բավարարելու, ո՛չ ահաբեկչության դեմ 40-ամյա պայքարում: Մեր երկիրը բազմիցս ենթարկվել է բացահայտ և քողարկված պատժամիջոցների, սպառնալիքների, ճնշումների և շանտաժի»,- ասել է Էրդողանը։

Նրա խոսքով՝ Թուրքիան ցանկանում է ՆԱՏՕ-ից տեսնել կոնկրետ քայլեր, այլ ոչ թե ահաբեկչության դեմ պայքարի դիվանագիտական հայտարարություններ։ «Որպես ՆԱՏՕ-ի համար գին վճարող երկիր՝ մենք ցանկանում ենք տեսնել կոնկրետ քայլեր, ոչ թե բաց դիվանագիտական հայտարարություններ»,- ասել է Թուրքիայի ղեկավարը։