Ադրբեջանը թույլ չի տա Հայաստանին՝ վերականգնել իր ռազմական և քաղաքական ռեսուրսները. Ադրբեջանի անվտանգության խորհրդի ղեկավար

Պատերազմում պարտված Հայաստանի քաղաքական շրջանակների, ինչպես նաև իշխանությունների և ընդդիմության անունից հանդես եկող ռազմական խունտայի ներկայացուցիչների կողմից ռևանշիստական հայտարարությունները չպետք է լուրջ ընդունվեն․ բարբաջել է Ադրբեջանի անվտանգության խորհրդի քարտուղար, գեներալ-գնդապետ Ռամիլ Ուսուբովը:

Նա հիշեցրել է, որ իր հարցազրույցներից մեկում երկրի դիկտատոր Ալիևն ասել է, որ Ադրբեջանը, հաջողությամբ կատարելով իր պատմական առաքելությունը, «ոչնչացրել է աշխարհի ամենաանողոք ֆաշիզմը՝ հայկականը»:

«Եվ եթե այս պետությունը և նրա հովանավորները կրկին փորձեն վերակենդանացնել հայկական ֆաշիզմը, ապա անմիջապես կկործանվեն: Նախագահ Իլհամ Ալիևի առանձնահատուկ վերաբերմունքն այս հարցում այնպիսին է, որ Հայաստանին թույլ չի տրվելու վերականգնել իր ռազմական և քաղաքական ռեսուրսները, որպեսզի այն կրկին սպառնալիքի չվերածվի»,- հայտարարել է Հայաստանում իշխանափոխությունից վախեցող Ադրբեջան պետության անվտանգության խորհրդի ղեկավարը: