ԵՄ-ն անտեսում է իր իսկ եվրոպական արժեքները. Թուրքիայի արտգործնախարար

Թուրքիայի արտգործնախարար Մևլյութ Չավուշօղլուն նոյեմբերի 6-ին Հարավարևելյան Եվրոպայում համագործակցության գործընթացին մասնակցող երկրների արտգործնախարարների ոչ պաշտոնական հանդիպման ժամանակ հայտարարել է, որ Եվրամիությունն անտեսում է եվրոպական արժեքները, որոնք «ինքն է փորձում առաջ տանել»:

«Եվրոպայում աճող պոպուլիզմը, ռասիզմը և իսլամի հանդեպ ատելությունը հակասում են այն արժեքներին, որոնք Եվրամիությունն ինքն է փորձում խթանել», - շեշտել է Չավուշօղլուն:

Թուրք նախարարը նշել է, որ եվրոպական ինտեգրման գործընթացն անհերքելի ներդրում է ունեցել տարածաշրջանի շատ երկրների զարգացման գործում, հատկապես` 1990-ականներին և 2000-ականների սկզբին: Նա ընդգծել է, որ Թուրքիան, որպես երկիր, որը շատ ոլորտներում արդյունքների է հասել ԵՄ-ի հետ ինտեգրման գործընթացում, ձգտում է համապատասխանել այս կազմակերպության հիմնադիրների կողմից սահմանված ինտեգրման իդեալներին և խստորեն դատապարտում է առկա խտրական միտումները: