Վառելիք տեղափոխող իրանական երրորդ լցանավը հասել է Վենեսուելա

Նավթավերամշակման գործարանի համար նախատեսվող վառելիք ու սարքավորումներ տեղափոխող իրանական երրորդ լցանավը հասել է Վենեսուելա. այս մասին հայտարարել է երկրի նախագահ Նիկոլաս Մադուրոն։

«Եվս մեկ անգամ ցանկանում են շնորհակալություն հայտնել Իրանի ժողովրդին ու կառավարությանը համերաշխության, քաջության համար, որը հնարավորություն ընձեռեց Վենեսուելային ստանալ արդեն երրորդ լցանավը՝ վառելիքով և վերամշակման վերականգնման համար սարքավորումներով», - նշել է Մադուրոն։

Նշենք, որ նախատեսվում է ընդհանուր առմամբ Վենեսուելա ուղարկել 5 լցանավ։ ԱՄՆ-ն բազմիցս է խոչընդոտել Վենեսուելայի համար կենսական նշանակություն ունեցող նավերի շարժը։ Մադուրոն հայտարարել է, որ այդ հարցով դիմելու է Միջազգային քրեական դատարան։