Նախարարը դիմում է բոլոր քաղաքացիներին. «Օգտվեք միայն կանոնավոր ուղևորափոխադրողների ծառայություններից»

Այսօր Վրաստանում Մցխեթա-Ստեպանցմինդա-Լարս ավտոճանապարհին տեղի ունեցած վթարի արդյունքում զոհվել է ազգությամբ երկու հայ, վիրավորվել` ՀՀ երեք քաղաքացի: Լրագրողների հետ զրույցում ՀՀ  տրանսպորտի և կապի նախարար  Վահան Մարտիրոսյանը նշեց, որ անհատին պատկանող ուղևորափոխադրամիջոց է եղել, նրա նկատմամբ դեռևս օգոստոսին էր տույժ կիրառվել:

Ինչ վերաբերում է հարցին, որ անօրինական ուղևորափոխադրումներ իրականացնող ընկերությունների մեքենաներն անընդմեջ վթարի են ենթարկվում, նախարարը նշեց, որ վթար կարող է լինել  նաև լիցենզավորված, կանոնավոր ուղևորափոխադրումներ իրականացնողների հետ, սակայն վերջին ժամանակների վթարների ուսումնասիրությունը ցույց է տալիս, որ դրանք պատահում են հիմնականում առաջինների պարագայում:

«Նորից դիմում եմ մեր բոլոր քաղաքացիներին, որ օգտվեն միայն կանոնավոր ուղևորափոխադրողների ծառայություններից: Այդ ընկերությունների գործունեությունը կարգավորված է լինում, տոմսերը վաճառվում են ավտոկայանից, մեքենաները ստուգված են լինում, երթուղին երկու վարորդ է ունենում»,- ասաց Մարտիրոսյանը: