Ճապոնիան հրաժարվել է պայքարել «Իսլամական պետության» դեմ

Ճապոնիայի իշխանությունները հրաժարվել են մասնակցել Իրաքի և Սիրիայի տարածքներում հաստատված «Իսլամական պետություն» (ԻՊ) ահաբեկչական խմբավորման դեմ ուղղված ռազմական գործողություններին, ինչի մասին հայտնել է երկրի պաշտպանության նախարար Տոմոմի Ինադան:

«Ինչ վերաբերում է ԻՊ-ի դեմ պայքարին, ապա մեր Ինքնապաշտպանական ուժերը չեն մասնակցի դրան: Խաղաղությունն ու կայունությունը պետք է հաստատել ոչ թե ուժով, այլ՝ օրենքի գերակայության և միջազգային համագործակցության միջոցով»,- մեջբերում է kp.ru-ն ճապոնացի պաշտոնյայի խոսքերը:

Աղբյուրը հավելում է, որ Ճապոնայի պաշտպանության նախարարությունը նույնպիսի որոշում է կայացրել նաև Հարավ-չինական ծովի համար. նույնիսկ այդ տարածաշրջանում իրավիճակի լարման դեպքում, Ճապոնիան չի պատրաստվում իր ռազմական նավերն այնտեղ ուղարկել:

Հավելենք, որ այժմ ԻՊ-ի դեմ պայքարում ներառված են Ռուսաստանը, Սիրիան, Իրաքն ու ԱՄՆ-ի գլխավորած միջազգային կոալիցիան: