Սիսի պատմական աթոռի վերադարձման հարցը տեղափոխվում է ՄԻԵԴ

Մեծի Տանն Կիլիկիո կաթողիկոսությունը հայց կներկայացնի Եվրոպայի մարդու իրավունքների դատարան՝ պահանջելով Սիսի պատմական կաթողիկոսարանի վերադարձը:

Ըստ «Ասպարէզ»-ի՝  մոտ երկու տարի շարունակվող աշխատանքներից հետո՝ նախորդ տարվա ապրիլի 28-ին, կաթողիկոսությունը Թուրքիայի Սահմանադրական դատարան հայց էր ներկայացրել վերոհիշյալ պահանջով: Սահմանադրական դատարանն իր հերթին դիմել էր Թուրքիայի արդարադատության նախարարություն՝ կարծիք ստանալու: Վերջինս թելադրել էր մերժել հայցը՝ այն իր իրավասությունների սահմաններից դուրս համարելով:

Այսպիսով` Մեծի Տանն Կիլիկիո կաթողիկոսությունը որոշել է դիմել ՄԻԵԴ: Այդ կապակցությամբ վաղը Բրյուսելի մամուլի ակումբում տեղի կունենա ասուլիս (տեղական ժամով՝ 13.00-ին), որին կմասնակցեն տեղական և միջազգային գործակալությունների, քաղաքական և ոչ կառավարական կազմակերպությունների ներկայացուցիչներ: Ասուլիսին կմասնակցեն նաև Վեհափառ հայրապետի ներկայացուցիչը, Բրյուսելում Հայ Դատի գրասենյակի տնօրենն ու նշյալ դատը հետապնդող իրավաբանների խմբի 5 ներկայացուցիչ: