Թալանել են McDonald´s-ը, երբ այնտեղ հատուկջոկատայիններ են ճաշել

Ֆրանսիայի Բըզանսոն քաղաքում երկու` մոտ 20 տարեկան երիտասարդներ փորձել են թալանել McDonald's-ի ռեստորանը` առանց իմանալու, որ այնտեղ ճաշում են ֆրանսիական ժանդարմերիայի միջամտության խմբի (GIGN) աշխատակիցներ. տեղեկացնում է РИА Новости-ն` վկայակոչելով France Bleu ռադիոկայանը: 

Դեպքը տեղի է ունեցել կիրակի: Որսորդական հրացանով զինված երիտասարդները մտել են ռեստորան, օդ կրակել ու տնօրենից գումար պահանջել: Սակայն նրանք չեն իմացել, որ ռեստորանում քաղաքացիական հագուստով մոտ 10 հատուկջոկատային է ճաշում: Այցելուների և ռեստորանի անձնակազմի շրջանում զոհերից խուսափելու համար հատուկջոկատայինները թույլ են տվել երիտասարդներին դուրս գալ ռեստորանից, ապա ձերբակալել նրանց ավտոկայանատեղիում: