Ոնց որ նորածին թոռնիկը պապիկին խորհուրդ տա. Ռուստամյանը` ՀՅԴ-ին ուղղված հորդորների մասին

ՀՅԴ խմբակցության ղեկավար Արմեն Ռուստամյանն այսօր խորհրդարանում լրագրողների հետ զրույցում անդրադարձավ «Ժառանգություն» կուսակցության ղեկավար Րաֆֆի Հովհաննիսյանի`ՀՅԴ-ին ուղղված հորդորին: Հիշեցնենք, որ Հովհաննիսյանը Դաշնակցությանը հորդորել էր վերանայել սեփական դիրքորոշումը և վերադառնալ ժողովրդի գիրկը:

«Ես միայն այն հորդորներն եմ լսում, որոնք Դաշնակցության տարիքին համեմատ են: Այ, երբ դրան համարժեք գործունեություն ծավալեն, նոր թող գան, խրատ տան: Ոնց որ նորածին թոռնիկը գնա, իր պապիկին խորհուրդ տա` ոնց պետք է ապրել այս կյանքում»,- ասաց նա:

Ռուստամյանը նշեց նաև, որ դժվար է քաղաքական դաշտում տեսնել Դաշնակցությանը մրցակից կուսակցություն:

Անդրադառնալով իշխող քաղաքական կուսակցությանը` նա ասաց, որ Հանրապետական կուսակցությունն էլ հին չէ: «ՀՀԿ-ն և պետությունը նույնացած կառույցներ են, իշխանությամբ պայմանավորված` ձևավորված կառույցներ են, դրանից առաջ էլ մեկ ուրիշն էր: Դուք նկատի ունեցեք այն կառույցները, որոնք, անկախ իրենց փոփոխության դաշտից, պահպանվել են»,- ընդգծեց Ռուստամյանը: