Քոչարյանի կարծիքը կիսողները փոքրամասնություն են. ՀՀԿ-ական

ԱԺ ՀՀԿ խմբակցության քարտուղար Գագիկ Մելիքյանն այսօր խորհրդարանում լրագրողների հետ զրույցում անդրադարձավ ՀՀ երկրորդ նախագահ Ռոբերտ Քոչարյանի հարցազրույցին, որում երկրորդ նախագահը խոսել է սահմանադրական բարեփոխումների մասին:

Մելիքյանի բնորոշմամբ` երկրորդ նախագահն ընդամենը կարծիք է հայտնել: «Կգտնվեն մարդիկ, ովքեր կկիսեն Ռոբերտ Քոչարյանի կարծիքը, բայց հասարակության և քաղաքական ուժերի հիմնական մեծամասնությունը այդ կարծիքը չի կիսի։ Նրանք, ովքեր տրամաբանություն և ճշմարտություն կտեսնեն Քոչարյանի խոսքերում, կկիսեն նրա կարծիքը, սակայն կարծում եմ՝ փոքրամասնություն կլինեն այդ մարդիկ»,- ասաց Գագիկ Մելիքյանը։

Պատասխանելով դիտարկմանը, թե ըստ Ռոբերտ Քոչարյանի` սահմանադրական բարեփոխումներից հետո երկրում կստեղծվի միակուսակցական համակարգ, ՀՀԿ-ականը հայտարարեց. «Ես համակարծիք չեմ, նման նախագիծը լայն հնարավորություն է տալիս բազմակուսակցականության զարգացմանը և մրցակցությանը, որը ԱԺ ձևավորման հարցում, ժողովրդավարության առումով, ավելի առաջադիմական ճանապարհ է»։