Ռուսաստանի դեմ «տեղեկատվական հարձակում» է սկսվել. Պուտին

ՌԴ նախագահ Վադիմիր Պուտինը Սիրիայի տարածքում ռուսական ավիահարվածների հետեւանքով խաղաղ բնակիչների մահվան մասին լուրերն  անվանել է «տեղեկատվական հարձակում» եւ հայտարարել է, որ  Ռուսաստանը պատրաստ է նման գրոհների նաեւ հետագայում:

Պուտինի խոսքով, սիրիացի խաղաղ բնակիչների շրջանում զոհերի մասին լուրերն ավելի վաղ են սկսել շրջանառվել, քան ռուսական  ինքնաթիռները հասել են այդ երկրի տարածք:

«Այլ երկրներն արդեն մեկ տարուց ավելի է սիրիական տարածքում  հարվածներ են հասցնում` առանց ՄԱԿ Անվտանգության խորհրդի համապատասխան բանաձեւի եւ սիրիական իշխանությունների պաշտոնական խնդրանքի: Մենք նման խնդրանք ունենք  եւ մտադիր ենք պայքարել հենց ահաբեկչական խմբավորումների դեմ»,- ասել է ՌԴ նախագահը:

Սիրիական «Սանա» պետական գործակալության տվյալներով ռուսական ավիացիան հարվածներ է հասցրել  «Իսլամական պետության» «որջերին» Ռաստանայում, Թել Բիսում, Զաֆարանիում, Թուլուլ ալ Հումրեում, Այդինում, Դեյր Ֆուլեում եւ Սալամիում:

Մինչդեռ սիրիական ընդդիմության ներկայացուցիչները հայտարարում են, որ այդ ավիահարվածների հետեւանքով տասնյակ խաղաղ բնակիչներ են զոհվել, այդ թվում` երեխաներ: Նրանք նշել են, որ ավիահարվածների թիրախ հանդիսացող եւ ոչ մի բնակավայր ԻՊ-ի կողմից չի վերահսկվում: