ԱԺ-ն դատապարտում է. հայտարարությունն ընդունվեց

Ձայների` 71 կողմ, 1 դեմ հարաբերակցությամբ ԱԺ-ն ընդունեց ազատամարտիկների և Արամ Մանուկյանի նկատմամբ իրականացված բռնարարքների կապակցությամբ դատապարտող հայտարարության տեքստը: Տեքստն ամբողջությամբ՝ ստորեւ:

Խոր մտահոգություն արտահայտելով վերջին շրջանում հայտնի քաղաքական, հասարակական գործիչների հանդեպ կատարված բռնությունների կապակցությամբ՝ Հայաստանի Հանրապետության Ազգային ժողովը հայտարարում է.

1. Անթույլատրելի ու դատապարտելի է համարում մարդկանց ազատ արտահայտվելու իրավունքը բռնությամբ լռեցնելու ցանկացած փորձ,

2. Դատապարտում է վերջին օրերին բարձրաստիճան պաշտոնատար անձանց, քաղաքական գործիչների անընդունելի կեցվածքներն ու հրապարակավ արած արտահայտությունները,

3. Շեշտում է, որ քաղաքական գործընթացներում բացառիկ կարևոր է զսպվածություն, հանդուրժողականություն պահպանելը, փոխադարձ վիրավորանքներից հրաժարվելը,

4. Դատապարտում է երկրի միջազգային վարկն ու ազգային միասնությունը խաթարող ցանկացած գործողություն,

5. Վերահաստատում է Ազգային ժողովի բարձր պատասխանատվությունը երկրում օրինականություն և բարոյաքաղաքական առողջ մթնոլորտ ապահովելու գործում:

ՀՀ Ազգային ժողովը իրավապահ մարմիններից պահանջում է սեղմ ժամկետներում ձեռնարկել հնարավոր բոլոր միջոցները և բացահայտել հասարակական գործիչների, ազատամարտիկների, ՀՀ ԱԺ պատգամավոր Արամ Մանուկյանի հանդեպ կատարված բռնարարքների հեղինակներին և պատասխանատվության ենթարկել օրենքի ողջ խստությամբ: