Նավթն ու դոլարը հարվածել են Ռուսաստանին և այլ զարգացող շուկաների

Նավթի նվազող գինն ու դոլարի փոխարժեքը հարվածել են Ռուսաստանին և այլ զարգացող շուկաների: Այդ մասին, ըստ Газета.Ru-ի, գրում է The Financial Times-ը:

Ըստ թերթի՝  երկուշաբթի JPMorgan Emerging Market Currency ինդեքսը, որն արտահայտում է զարգացող երկրների ազգային արժույթների փոխարժեքները, ընկել է՝ հասնելով ամենացածր ցուցանիշին` 2000 թվականից  ի վեր:

Ուժեղացած դոլարը շարունակում է ճնշում գործադրել Brent նավթի գնի վրա: Երկուշաբթի մեկ բարելի գինը եղել է 66 դոլարից փոքր-ինչ ավելի, ինչն անդրադարձել է էներգետիկ ընկերությունների և նավթ արդյունահանող երկրների վրա:

Պարբերականը նշում է, որ Ռուսաստանը, որը փորձում է հաղթահարել արևմտյան պատժամիջոցների հետևանքները, վերջերս վերապրեց ռուբլու ամենալուրջ անկումը, որը 1998-ի ֆինանսական ճգնաժամից ի վեր չէր գրանցվել: