Հովիկ Աբրահամյանը կատարել է իր խոստումը

Կառավարության մամուլի ծառայությունից հայտնում են, որ վարչապետ Հովիկ Աբրահամյանն այսօր ընդունել է Երեւանի Ֆիրդուսի՝ 33-րդ թաղամասի կառուցապատման արդյունքում օտարված բնակելի տարածքների բնակիչներին:

Հովիկ Աբրահամյանի առաջարկով բնակիչները ներկայացրել են իրենց խնդիրները, որոնք տարբեր էին՝ բնակարանների վարձավճարների ուշացումից մինչեւ տրամադրվելիք բնակարանների շինարարական աշխատանքների դանդաղ ընթացք: Վարչապետ Աբրահամյանն ընդգծել է, որ բարձրաձայնված հարցերը բազմաբնույթ են եւ ընդգրկուն. ժամանակ է անհրաժեշտ դրանց մանրակրկիտ ծանոթանալու եւ լուծման տարբերակները քննարկելու համար:

Վարչապետը հավաստիացրել է, որ բնակիչներին հուզող խնդիրները գտնվելու են իր ուշադրության կենտրոնում եւ պայմանավորվածություն ձեռք բերել դրանց վերջնական լուծում տալու նպատակով հանդիպումը տեղափոխել հաջորդ ամիս:

Հիշեցնենք, որ անցյալ հինգշաբթի օրը, ՀՀԿ ԳՄ նիստին ժամանելիս, վարչապետ Հովիկ Աբրահամյանը մոտեցել էր ՀՀԿ գրասենյակի առջև հավաքված Ֆիրդուսի բնակիչներին և խոստացել նրանց, որ ինքը անպայման կծանոթանա նրանց խնդիրներին և հնարավորության սահմաններում դրանք կլուծվեն: