Թուրքիայի ԱԳՆ-ն Օբամայի ուղերձը համարում է ''միակողմանի եւ աչառու''

Թուրքիայի ԱԳՆ-ն դատապարտել է ԱՄՆ նախագահ Բարաք Օբամայի` ապրիլի 24-ի ավանդական ուղերձը` ի հիշատակ Հայոց ցեղասպանության զոհերի` այն որակելով «միակողմանի, աչառու եւ ոչ օբյեկտիվ». տեղեկացնում է Regnum գործակալությունը:

«Իր` ապրիլի 24-ի ուղերձում ԱՄՆ նախագահ Օբաման, ցավոք, դարձյալ ցուցաբերեց միակողմանի մոտեցում, որն արտացոլում է հայկական կողմի դիրքորոշումը թուրքերի եւ հայերի` ընդհանուր պատմության ցավոտ թեմայի շուրջ վեճի վերաբերյալ: Մենք այդ հայտարարությունը դիտարկում ենք որպես պատմական փաստերը խեղաթյուրող, ամեն տեսնակյունից խնդրահարույց եւ արտահայտում ենք մեր ափսոսանքն այդ կապակցությամբ»,- ասվում է Թուրքիայի ԱԳՆ-ի հայտարարության մեջ:

Ըստ Թուրքիայի ԱԳՆ-ի` ուղերձն արվել է ներքին քաղաքական նկատառումներով եւ վնասում է ոչ միայն թուրք-ամերիկյան հարաբերություններին, այլ նաեւ թուրքերի եւ հայերի միջեւ արդարացի որոշում գտնելուն:

«Անկարան սպասում է, որ Վաշինգտոնը, որպես Թուրքիայի կարեւոր գործընկեր, չի խորացնի այսուհետ խնդիրը, այլ դրա փոխարեն կառուցողականություն կցուցաբերի որոշում գտնելու հարցում, նաեւ հայկական կողմին, որը խուսափում է հարցի գիտական հետազոտությունից, կհամոզի ավելի իրատեսական եւ հաշտարար լինել»,- ասվում է հայտարարության մեջ: