Բեռլուսկոնիի դեմ նոր գործ է հարուցվել

Նեապոլի դատախազությունը Իտալիայի նախկին վարչապետ Սիլվիո Բեռլուսկոնիի դեմ նոր գործ է հարուցել: Նա մեղադրվում է կոռուպցիայի և քաղաքական կուսակցությունների ապօրինի ֆինանսավորման մեջ. հայտնում է РИА Новости-ն:

Ըստ մեղադրանքի` Բեռլուսկոնին երեք միլիոն եվրո է առաջարկել սենատոր Սերջո դե Գրեգորիոյին, որ վերջինս վարչապետ Ռոմանո Պրոդիի ձախակենտրոն դաշինքից աջ ընդդիմության ճամբար անցնի:

Սերջո դե Գրեգորիոն Իտալիայի Սենատի անդամ է ընտրվել 2006-ին`«Արժեքների Իտալիա» կուսակցության դաշինքի կազմում: Կուսակցությունը գլխավորում էր Բեռլուսկոնիի քաղաքական հակառակորդ Անտոնիո դի Պիետրոն: Սական, հետո, շատ անսպասելի, Գրեգորիոն կտրուկ փոխում է իր քաղաքական նախապատվությունները և միանում Բեռլուսկոնիի կողմնակիցներին: