Ազգովի` "դարձ առ գիրք"

Այսօր տեղի ունեցավ «Դարձ առ գիրք» գրքարվեստի միջազգային 2-րդ փառատոնի պաշտոնական բացումը. այն կտևի մինչև հոկտեմբերի 25-ը: Փառատոնի ընթացքում կազմակերպվելու են բազմաբնույթ միջոցառումներ և ակցիաներ` գրքի ցուցահանդես-վաճառք, սեմինար-քննարկումներ:

«Վաղը տեղի կունենա հայկական տարազի մասին դասախոսություն, որը կվարի Նևրիկ Ազատյանը»,- ասաց Խնկո Ապոր անվան ազգային մանկական գրադարանի տնօրեն Ռուզան Տոնոյանը` հավելելով, որ այսօր գրադարանի ճեմասրահում ցուցադրվել են Հայաստանի 12 մայրաքաղաքներին բնորոշ տարազներ:

Փառատոնը մեկնարկել է հոկտեմբերի 5-ին՝ «Ժամանակակից մանկական գրքի նկարազարդումը Գերմանիայում» թեմայով՝ գերմանացի 13 հայտնի նկարիչների ցուցահանդեսով, որը կգործի մինչև հոկտեմբերի 28-ը Վ. Գյոթեի ինստիտուտում:

«Գերմանական պատկերազարդ նկարներն արտահայտում են հեգնանք, պոեզիա, կախարդական ձգտումներ. սրանք այն պատկերն են են, որ ապրում են յուրաքանչյուրիս մեջ»,- ասաց Գերմանիայի փոխդեսպան Քրիստոֆ Բրոյնիգը` հավելելով, որ ցուցահանդեսը հնարավորություն է ընձեռում ծանոթանալու մանկական գրքեր պատկերազարդող գերմանացի նկարիչների ստեղծագործություններին:

Աննա ՄԱԹԵՎՈՍՅԱՆ