Փառատոնը կսկսվի ծիրանօրհնեքով

Հուլիսի 10-ին կմեկնարկի «Ոսկե ծիրան» երևանյան միջազգային 8-րդ կինոփառատոնը։

Այս տարի մրցութային 4` խաղարկային, վավերագրական, «Հայկական համայնապատկեր» և «Կորիզ» անվանակարգերում ներառված ֆիլմերը կդատեն միջազգային ժյուրիի 6 անդամները։

«Այս անգամ էլ փառատոնը կսկսվի ծիրանօրհնեքով, կլինի համերգ, և ամեն երեկո Շառլ Ազնավուրի անվան հրապարակում կլինեն համերգներ: Ֆիլմի դիտումներին կհաջորդեն քննարկումներ: Այն ամենն, ինչ ամեն տարի լինում է»,- նշեց կինոռեժիսոր Հարություն Խաչատրյանը։

«ԱՊՀ երկրների կինոն. անկախության 20 տարի» ծրագրում, ըստ նրա, մասնակցում են ֆիլմեր ԱՊՀ գրեթե բոլոր երկրներից՝ Հայաստան, Բելառուս, Ղազախստան, Ղրղզստան, Մոլդովա, Ռուսաստան, Տաջիկստան, Ուզբեկստան, Ուկրաինա, և այդ երկրներից եկած կինոգործիչները քննարկելու են ժամանակակից կինոյի խնդիրները։

Ըստ Խաչատրյանի՝ տարեցտարի տարբեր խնդիրներ են լուծվում, և այս տարի ինքը մտադիր է լուծել ֆիլմերն առավել հասանելի դարձնելու խնդիրը։

«Դահլիճները չեն մեծանում, աթոռները չեն շատանում, հանդիսատեսը չի շատանում, բայց այդ խնդիրը կլուծվի։ Ես դա ինձ խոսք եմ տվել և հույս ունեմ, այդ խնդիրը լուծելու եմ»,- ասաց Հ.Խաչատրյանը։