Մեղրեցիներն ահազանգում են. հանցագործն ազատության մեջ է

Մոտ մեկուկես տարի առաջ Մեղրիում ավտովթարի զոհ դարձան չորս տղամարդ: Դատարանը մեղավորին` «Էդեմ» ռեստորանային համալիրի տնօրեն Հրաչիկ Հայրապետյանին դատապարտեց 8 տարվա ազատազրկման, սակայն մեղրեցիներն ահազանգում են, որ Հրաչիկ Հայրապետյանը, ով հաշվառված է դատապարտյալներով բնակեցված Նյուվադի գյուղում, իրականում Մեղրիում է ու շարունակում է աշխատեցնել իր ռեստորանային համալիրն ու դրան կից գիշերային ակումբը:

Ավելին` նա սերտ ընկերական կապերի մեջ է քաղաքի ոստիկանապետ Արմեն Առաքելյանի հետ, ով Մեղրիում կատարվող բազմաթիվ դանակահարությունների եւ «ռազբորկաների» ակտիվ մասնակիցն է եղել:

Մեղրեցիներն ասում են, որ երկուսին հաճախ կարելի է տեսնել «Էդեմ» համալիրում: Ու մինչ մտերիմներով քեֆ են անում, քաղաքի բնակիչներն ասում են, որ այլեւս անհնար է նրանց հետ ապրել նույն քաղաքում: