ՀԱՅԿԱԿԱՆ ԺԱՄԱՆԱԿ. Գոյատեւում են

Երեկ մեզ հայտնի դարձավ, որ հունվարից աշխատավարձ չեն ստացել Արագածոտնի մարզի դպրոցների ուսուցիչները:

Եթե մայրաքաղաքի դպրոցներում ուսուցիչներին այս ընթացքում գոնե ավանս են տվել, ապա Արագածոտնի մարզում դա էլ չի եղել: Մարզից մեզ զանգահարած ուսուցիչները տեղեկացրին նաեւ, որ իրենց մեծ մասը վարկեր ունեն, որոնց վճարման ժամկետներն անցել են, եւ ոչ մի կերպ չեն կարողանում փակել դրանք: Ավելին, ըստ ուսուցիչների, իրենք անգամ օրվա սննդի հարցն արդեն չեն կարողանում հոգալ:

Երեկ մեզ հայտնի դարձավ նաեւ, որ հունվարից աշխատավարձ չեն ստացել նաեւ Մատենադարանի աշխատակիցները:

Ինչպես նշել էինք, բյուջեի հավաքագրումները հունվարին խիստ ցածր են եղել սպասվածից: Ըստ որոշ տեղեկությունների` վիճակը վատ է նաեւ փետրվարին` բյուջեում փող չի հավաքվում: Աշխատավարձեր չտալը կարող է նաեւ պայմանավորված լինել մարդկանց գնողունակությունը նվազեցնելու եւ դրանով գնաճը զսպելու նկատառումներով: