Իրանի միջուկային ծրագրի ավարտված լինելու մասին խոսակցությունները պարզապես պատրանք են․նախագահ Փեզեշքիան

Իրանի Իսլամական Հանրապետության նախագահ Մասուդ Փեզեշքիանը հայտարարել է, որ Թեհրանի միջուկային ծրագրի ավարտի մասին ցանկացած խոսակցություն պարզապես պատրանք է՝ ընդգծելով, որ դրա շուրջ բանակցությունները պետք է վարվեն բոլորի համար շահավետ սկզբունքով։

Այս մասին հայտնում է իրանական IRNA-ն՝ մեջբերելով Իրանի նախագահի հայտարարություններն՝ արված Կատարի «Ալ Ջազիրա» հեռուստաընկերության հետ հարցազրույցում։

«ԱՄՆ նախագահ Դոնալդ Թրամփն ասում է, որ Իրանը չպետք է միջուկային զենք ունենա, և մենք ընդունում ենք դա, քանի որ մենք մերժում ենք միջուկային զենքը, և սա մեր քաղաքական, կրոնական, մարդասիրական և ռազմավարական դիրքորոշումն է»,- ասել է Փեզեշքիանը։

Նա հավելել է, որ Թեհրանը շեշտում է իրանական միջուկային ծրագրի և ուրանի հարստացման շարունակության իրավունքը՝ միջազգային իրավունքի շրջանակներում։

Աղբյուրի փոխանցմամբ՝ Իսլամական Հանրապետության նախագահը նաև հերքել է Դոնալդ Թրամփի պնդումները, թե Իրանի միջուկային ծրագիրն ավարտվել է Ֆորդոյի, Սպահանի և Նաթանզի երեք օբյեկտների վրա Վաշինգտոնի կողմից հասցված ավիահարվածների պատճառով։

«Թրամփի պնդումը, որ մեր միջուկային ծրագիրն ավարտվել է, պարզապես պատրանք է»,-ասել է նա՝ հավելելով, որ Իրանի միջուկային հնարավորությունները գտնվում են նրա գիտնականների մտքում, այլ ոչ թե օբյեկտներում։

Մասուդ Փեզեշքիանն ասել է, որ Իրանը հավատում է դիվանագիտությանը, հետևաբար ցանկացած ապագա բանակցություն պետք է լինի փոխադարձ շահեկան տրամաբանությամբ, և Թեհրանը չի ընդունի սպառնալիքներ և թելադրանքներ։

«Իրանը պատրաստ է Իսրայելի կողմից իր դեմ սկսած ցանկացած պատերազմի, իսկ զինված ուժերը լիովին պատրաստ են հարվածել Իսրայելի կողմից օկուպացված տարածքների խորքը։ Իրանը պատերազմ չի փնտրում և չի ենթադրում, որ Իսրայելի հետ հրադադարը մշտական է։ Իսլամական Հանրապետությունը կպաշտպանի իր տարածքը ողջ ուժով և երբեք չի հանձնվի»,- ընդգծել է Փեզեշքիանը։

Վերջինս նաև շեշտել է, որ Իրանը լուրջ հարվածներ է հասցրել Իսրայելին հունիսին տեղի ունեցած 12-օրյա պատերազմի ժամանակ՝ ընդգծելով, որ Թել Ավիվը թաքցնում է կրած վնասի չափը։

«Իսրայելը փորձել է թուլացնել և անկայունացնել Իսլամական Հանրապետությունը քաոսի և թիրախային հարձակումների միջոցով, բայց, ի վերջո, ձախողվել է»,- ասել է նա։

Հունիսի 13-ին Իսրայելը սկսեց օդային հարվածներ հասցնել Իրանի տարածքին՝ թիրախ դարձնելով իրանական միջուկային օբյեկտներն ու ռազմական հենակետերը։ Օրեր անց, Իրանի տարածքի ռմբակոծություն սկսեց նաև Միացյալ Նահանգները։ Պատերազմը դադարեցվեց հունիսի 24-ին՝ ԱՄՆ միջնորդությամբ։