Ադրբեջանում ռազմաճակատում ձախողումները վերագրվում են թալիշներին

Ադրբեջանական ռեսուրսներում նպատակային տարածվում է թալիշներին վարկաբեկող տեղեկատվություն: Արդեն սկսել են մեղադրել ռազմաճակատում ձախողումների համար. հայտնում է Talyshstan times-ը:

Այն բանից հետո, երբ ադրբեջանական պահեստազորային զորքերի երկու գումարտակ, ուղևորվելով դեպի առաջնագիծ՝ Ջաբրայիլի շրջանի ուղղությամբ, ընկել է հրետանային կրակի տակ և ամբողջությամբ ոչնչացվել, ռազմական հրամանատարությունը շտապել է մեղադրել թալիշներին: Ադրբեջանի զինված ուժերի երկու թալիշ զինծառայողներ ձերբակալվել են այն մեղադրանքով, թե իբր հայկական կողմին փոխանցել են շարասյան երթուղու մանրամասները:

Ադրբեջանական մամուլն անմիջապես թալիշներին անվանել է «դավաճաններ, որոնք մեզ հետ նույն հարկի տակ են ապրում»՝ ցանկանալով, «որ ադրբեջանական հացը մնա իրենց կոկորդում»:

Պետք է ենթադրել, որ, ադրբեջանական բանակի նահանջին զուգահեռ, թալիշների, ինչպես նաև ազգային այլ փոքրամասնությունների ներկայացուցիչների դեմ մեղադրանքների քանակը ձնագնդի պես կաճի: