ԱՄՆ Հայ դատի հանձնախումբը բողոքի ակցիա կկազմակերպի Վաշինգտոնում՝ Թրամփի հետ Էրդողանի հանդիպման ժամանակ

ԱՄՆ Հայ դատի հանձնախումբն իր կողմնակիցներին կոչ է արել միանալ նոյեմբերի 13-ին Սպիտակ տանը Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հանդիպումից առաջ անցկացվելիք բողոքի ակցիային. ըստ Yerkir.am-ի՝ հայտնում է ԱՄՆ Հայ դատի հանձնախումբը՝ մեջբերելով Ahval News-ի հրապարակումը:

«Բողոքի ակցիայի մասնակիցները կհավաքվեն Սպիտակ տան մոտ՝ Լաֆայեթ պուրակում»,- նշվում է ԱՄՆ Հայ դատի հանձնախմբի թվիթերյան միկրոբլոգում հրապարակված հայտարարությունում։

Իր կոչում կազմակերպությունը մեղադրում է թուրք նախագահին մի շարք հանցագործությունների մեջ, ինչպիսիք են՝ ժողովրդավարության դեմ գործողությունները, եկեղեցիների անարգումը, Սիրիա ներխուժումը, քրդերի սպանությունները և Հայոց ցեղասպանության ժխտումը։

Yerkir.am-ն ավելի վաղ տեղեկացրել էր, որ Էրդողանը Վաշինգտոն է մեկնելու նոյեմբերի 13-ին՝ ԱՄՆ նախագահ Դոնալդ Թրամփի հետ Սիրիայում ստեղծված իրավիճակը քննարկելու: 

Հիշեցնենք, որ ԱՄՆ Ներկայացուցիչների պալատը հոկտեմբերի 29-ի ընդունել էր Օսմանյան կայսրությունում իրականացված Հայոց ցեղասպանությունը ճանաչող բանաձև: